निर्वाचन आउन २ दिन बाँकी रहँदा रसुवामा आक्रमणको घटना बढेको छ । बिहीबार राति जिल्लाको दुई स्थानमा आक्रमण तथा झडप भएको छ । जिल्लाको कालिका गाउँपालिका–२ चिउरीबोटमा नयाँ शक्तिका कार्यकर्ताले नेकपा एमालेको गाडी रोकेर आक्रमण गरेपछि प्रहरीले १३ राउण्ड हवाइफायर गरेको छ । एमालेले चुनावी अभियान सकाएर गाउँपालिकाको काभ्रेबाट कालिकास्थान जाने क्रममा चिउरीबोटमा मेस सञ्चालन गरेर बसेका नयाँ शक्तिका कार्यकर्ताले गाडी रोकेर आक्रमण गरेका थिए । आक्रमणबाट बा १६ च ५७५४ नम्बरको स्कार्पियोको अगाडिको सिसा फुटेको छ । आक्रमण भएको खबर पाए लगत्तै कालिकास्थानबाट गएको प्रहरीले छुटाउन खोज्दा प्रहरीलाई पनि आक्रमण गर्न खोजेपछि हवाइफायर गर्न बाध्य भएको प्रहरी नायब उपरिक्षक सरत कुमार थापा क्षेत्रीले बताए । उनले भने, ‘नयाँ शक्तिका कार्यकर्ताले चिउरीबोट अगाडी सडक अबरोध गरेर एमालेको गाडीमा आक्रमण गर्न थालेपछि प्रहरी पुगेको थियो, सम्झाउन खोज्दा प्रहरीमाथि आइलागेपछि स्थिति नियन्त्रणमा लिनका लागि हवाइफायर गरिएको हो ।’