2013-11-11
Province 1, Khotang, Rupakot Majhuwagadhi
नेर्पा गाविस-५ निवासी एमाले गाउँ पार्टी कमिटीका सदस्य ६० वर्षीय नरसिंहबहादुर खड्कालाई नेपाली काङ्ग्रेसका कार्यकर्ताहरू दोर्पाचिउरीडाँडा गाविस-९ का ४५ वर्षीय डिल्ली गुरुङ, २५ वर्षीय नन्दीराम थापा सहितको करीव १५-१६ जनाको समूहले कात्तिक २५ गते राती १० बजे खुकुरी प्रहार गरी घाइते बनाएका छन् ।
चुनाव प्रचार-प्रसारका लागि दोर्पाचिउरीडाँडा गाविस-९ थापागाउँ पुगेका खड्कालाई एक्कासी उक्त समूहले खुकुरी प्रहार गरेको र उनिसँगै गएका नेर्पा गाविस-५ का १८ वर्षीय शिवजी खड्का र दोर्पाचिउरीडाँडा गाविस-९ का २३ वर्षीय लालबहादुर गुरुङलाई अपहरण गरेको घाइते खड्काले बताएका छन् । खुकुरी प्रहारबाट खड्काको टाउको र बाँया आँखा छेउमा गहिरो चोट लागेको छ ।
काङ्ग्रेस कार्यकर्ताद्वारा अपहरणमा परेका दुवैजनालाई राती नै दोवेला प्रहरी चौकीले दोबेलाबीचबाट उद्धार गरेको र उनिहरूको हातमा चोट र शरीरमा निलडाम भएको प्रहरीले जनाएको छ । जिल्ला प्रहरी कार्यालय दिक्तेलका इन्सपेक्टर दुर्गाराज रेग्मीले घाइते अवस्थामा उद्दार गरिएका उनिहरूलाई सदरमुकाम ल्याउँदै गरेको बताए ।
यसैबीच, खुकुरी प्रहारबाट लागेको चोटको घाउजाँच गराई आरोपितहरूलाई कानुनी कारबाहीको माग गर्दै पीडितले जिल्ला प्रहरी कार्यालय दिक्तेलमा कात्तिक २६ गते उजुरी दिएका छन् । उजुरीको आधारमा पीडितको जिल्ला स्वास्थ्य कार्यालय दिक्तेलमा स्वास्थ्यपरीक्षण तथा उपचार भईरहेको छ भने घटनामा संलग्नहरूको खोजी भईरहेको इन्सपेक्टर रेग्मीले बताए ।
नेकपा (एमाले)का जिल्ला उपसचिव रामप्रसाद दंगालले यस घटना राजनीतिक स्वार्थका लागि गरिएको आरोप लगाए । संविधानसभा निर्वाचन नजिकिँदै गरेको अवस्थामा यसप्रकारको घटना हुनुले मानवअधिकार उल्लङ्घन भएको उनले बताए । नेपाली काङ्ग्रेस क्षेत्र नं. २ का प्रत्यक्ष उम्मेदवार तथा जिल्ला सभापति विष्णुकुमार राईले एमाले कार्यकर्ताले काङ्ग्रेस कार्यकर्ताको घरको थाम काटेपछि आफूहरूको कार्यकर्ताले प्रतिकार स्वरुप नियन्त्रणमा लिएर प्रहरीलाई बुझाएको बताए ।
डिएम चाम्लिङ राई