काठमाडौं- रुकुमपश्चिममा कुखुरा चोरेको भन्दै छिमेकीको कुटपिटबाट शनिबार एक बालकको मृत्यु भएको छ।

मुसिकोट नगरपालिका- ४ ताङतुंगेका ९ वर्षीय भुवन विकको मृत्यु भएको हाे।

कुखुरा चोरेको आरोपमा स्थानीय रामबहादुर बुढाथोकीले शुक्रबार बालकलाई निर्घात कुटपिट गरेका थिए।

जिल्ला प्रहरी कार्यालयका अनुसार गम्भीर बिरामी भएका बालकलाई उपचारको लागि शनिबार बिहान जिल्ला अस्पताल सल्ले लगिएको थियो। अस्पताल लगेपछि स्वास्थ्यकर्मीले उनलाई मृत घोषणा गरेका थिए।

कुटपिटबाट गम्भीर घाइते भएका बालकलाई २ दिनसम्म उपचार नगरी घरमै राख्दा उनको अवस्था चिन्ताजनक बनेको प्रहरीले जनाएकाे छ।

बुढाथाेकीलाई ‍पक्राउ गरी कारबाही प्रक्रिया अघि बढाइएकाे छ।