राष्ट्रिय जनता पार्टीका केन्द्रीय उपाध्यक्षसहित ६ नेतालाई प्रहरीले बिहीबार सदरमुकाम परासीबाट पक्राउ गरेको छ । निर्वाचन विरोधी गतिविधि गरेको भन्दै केन्द्रीय उपाध्यक्ष गोविन्द चौधरी, जिल्ला संयोजक पुरन चौधरी र नेताहरु राधेरामण पाण्डे, विजय अग्रहरी, ओमप्रकाश चौधरी अभिमन्यू यादवलाई पक्राउ गरेको जिल्ला प्रहरी कार्यालयका प्रमुख एसपी राजेन्द्रप्रसाद चौधरीले जानकारी दिए । निर्वाचन गतिविधिमा असर पर्ने क्रियाकलाप गरेको आरोप लगाउँदै उनीहरुलाई प्रहरीले नियन्त्रणमा लिएको हो । यसअघि प्रहरीले शनिबार पनि राजपाका २५ भन्दा बढी नेता कार्यकर्तालाई पक्राउ गरी सोमबार छाडेको थियो । राजपाले आफ्नो पकड मानिने क्षेत्रमा कालोझण्डा घर घरमा राखेर विरोध जनाउँदै आएको छ ।