बुधवार राति लुटपाट र कुटपिट गर्ने गिरोहका तीनजनालाई वडा प्रहरी कार्यालय, श्रीपुरले पक्राउ गरेको छ। पक्राउ पर्नेमा वीरगंज-३२ चोर्नी निवासी अजयकुमार महतो, उमेश मण्डल र सुरेश यादव रहेका छन् । घटनामा संलग्न मुनीलाल र जनी महतो फरार रहेका प्रहरी निरीक्षक चक्र मल्लले जानकारी गराए।

घटना विवरण अनुसार वीरगंज-३२  कोन्हिया निवासी वीरेन्द्र राम घर जाने क्रममा जीतपुर दाल मिलदेखि कोन्हिया जाने बाटोमा चार/पाँच जनाको समूहले धारिलो हतियार प्रहार गरी रामसँग रहेको नगद ७५ हजार लुटेको उजूरीपछि प्रहरीले उनीहरूलाई पक्राउ गरेको जनाएको छ।

घाइतेको उपचार नारायणी अस्पतालमा भइरहेको छ । उनको शरीरका तीन ठाउँमा चोट लागेको देखिन्छ । मेडिकल रिपोर्ट आएपछि थप अनुसन्धान हुने प्रनि मल्लले जानकारी दिए । स्थानीय युवा शम्भु पटेलका अनुसार सो ठाउँमा सातापिच्छे चोरी र लुटपाटका घटना बढ्दै गएको बताए । प्रहरीले अहिलेसम्म तीनजनालाई मात्र पक्राउ गरेको छ भने अन्यको खोजी भइरहेको बताएको छ।