रौतहट — मदिरा सेवनपछि भएको सामान्य विवादमा चन्द्रपुर–१० बडेहर्वाका ३२ वर्षीय मेथुन माझीको हत्या भएको छ । शुक्रबार साँझ शंकास्पद अवस्थामा बडेहर्वाबाट बालचनपुर जाने सडकमा उनको शव फेला परेको थियो । घटनामा संलग्न भएको आरोपमा धर्मेन्द्र माझी र नागेन्द्र माझी पक्राउ परेका छन् ।

बिहीबार राति डुमरियाबाट मादक पदार्थ सेवन गरी घर जाँदै गरेका मेथुनको धर्मेन्द्र र नागेन्द्रसँग जम्काभेट भएको थियो । मदिराले लट्ठ बनेका उनीहरूबीच आपसमा धक्का दिएको निहुँमा विवाद भयो । विवाद बढ्दै गएपछि दुई जनाले बाँसको चिर्पटले मेथुनको कानमा घोचेर हत्या गरेको खुलेको इलाका प्रहरी कार्यालय चन्द्रनिगाहपुरका प्रहरी सहायक निरीक्षक रञ्जित सिंहले बताए । उनीहरूले हत्या गरेको प्रहरीसमक्ष स्विकारेका हुन् । मृतक मेथुनको दाहिने कानमा तिखो वस्तुले घोचेको पाइएको छ । प्रहरीले घटनास्थल वरपर चप्पल, रगत लागेको बाँसको चिर्पट फेला पारेको थियो । माझीको टाउको र शरीरका केही भागमा नीलडाम देखिएको छ ।