Shekhar Dhakal
सुनसरी । ०७१ असार ९ गते
धरान नपा-१६ का ४० वर्षीय भुलकाजी विश्वकर्माले छुवाछूत विरुद्ध दिएको उजुरी कार्यन्वयन नभई असार ८ गते प्रहरीको रोहबरमा सहभोज गरी मिलापत्र भएको छ ।
छिमेकी ५० वर्षीया भगवती भण्डारीले छोरा जीवनको विवाहमा सघाउन बोलाएर छुवाछूत गरी दुर्व्यवहार गरेको आरोपमा भुलकाजीले असार ७ गते इलाका प्रहरी कार्यलय धरानमा उजुरी दिएका थिए । विवाहमा भगवतीले काम सघाउन बोलाए पनि खानेकुरा छोइन्छ परै बस्नु भनेर आफूलाई जातीयरुपमा विभेद गरेको भुलकाजीले उजुरीमा उल्लेख गरेका थिए ।
छुवाछूतको आरोपमा प्रहरीले भगवतीलाई गिरफ्तार गरे पनि इलाका प्रहरी कार्यालयमा दुवै पक्ष र समाजका अगुवासमेत भेला भई मिलापत्र गरेको पत्रकार दिनेश गजमेरले इन्सेक प्रतिनिधिलाई जानकारी दिए । दलित उत्थान समन्वय समितिका अध्यक्ष लीला शंकरसहितका समाजका अगुवाहरू बसेर सहभोज गराइ पुनः जातीय छुवाछूत नगर्ने सर्तमा मिलापत्र गरिएको उनले जानकारी दिए ।
पीडित र आरोपित दुवै पक्षका व्यक्तिसहित समाजका अगुवाहरू आएर इलाका प्रहरी कार्यालयको परिसरमा मिलापत्र गर्ने भनेपछि उजुरी परे पनि कारबाही अघि नबढाएको इन्स्पेक्टर मुकुन्द रिजालले बताए ।
शेखर ढकाल