विराटनगर / ओखलढुङ्गामा मादक पदार्थ सेवन (मापसे) गरेर दुई जनाबीच कुटाकुट हुँदा एक जनाको मृत्यु भएको छ।

शनिबार राति ९ बजेतिर भएको घटनामा खजिदेम्बा गाउँपालिका–१ आरुबोटेका ६० वर्षीय महेशकुमार खड्काको मृत्यु भएको हो । प्रदेश १ प्रहरी कार्यालय विराटनगरका प्रवक्ता एसपी महेन्द्रकुमार श्रेष्ठका अनुसार ५० वर्षीय प्रेमबहादुर सुनुवारसँग खड्काको झगडा भएको थियो ।

कुटाकुटपछि गम्भीर घाइते भएका खड्काको घटनास्थलमै मृत्यु भएको एसपी श्रेष्ठले बताए । प्रहरीका अनुसार मापसे गरेर सुनुवार झगडा गर्न खड्काकै घरमा पुगेका थिए । दोहोरो कुटाकुटमा उनी पनि सामान्य घाइते भएका छन् । उपचारपछि उनलाई नियन्त्रणमा लिएर घटनाको अनुसन्धान थालिएको प्रहरीले जनाएको छ ।