स्थानीय तहको पुनर्संरचनामा गाउँपालिकाको संख्या तथा सिमाना निर्धारणको विषयलाई लिएर धुन्चेवासीले गरेको आन्दोलनको समाचार बजाएको आरोपमा प्रहरीले रेडियो रसुवाका अध्यक्ष दीपक लामालाई पक्राउ गरेको छ । धुन्चेवासीले सोमबारदेखि गरेको रसुवा बन्दलाई पहिलो प्राथमिकता दिई समाचार प्रसारण गरेको आरोप लगाउँदै बुधबार साँझ लामालाई प्रहरीले पक्राउ गरेको हो । स्थानीय तहको पुनर्संरचनामा गाउँपालिकाको संख्या तथा सिमाना निर्धारणको क्रममा शनिबार जिविसमा भएको झडपमा दुई नेता घाइते भएका थिए । घटनामा संलग्न भएको भन्दै प्रहरीले खोजी गरेपछि लामा प्रहरीसमक्ष उपस्थित भएका थिए । प्रहरीले तत्कालै उनलाई नियन्त्रणमा लिएको थियो । पत्रकार महासंघ रसुवाका सदस्यसमेत रहेका लामालाई पक्राउ गरेसँगै रेडियो रसुवा, पत्रकार महासंघ, प्रेस चौतारी, प्रेस युनियनलगायतले रसुवा प्रशासनको ध्यानाकर्षण गराएका छन् । ती संस्थाले छुट्टाछुट्टै विज्ञप्तिमार्फत पक्राउको भत्र्सना गरेका छन् ।