Kali Bahadur Malla प्रेस चौतारी नेपाल कालिकोटका अध्यक्ष एवम् नागरिक दैनिकमा कार्यरत २८ वर्षीय पवित्र शाही र कारोबार दैनिकमा कार्यरत ३२ वर्षीय रमेश रावललाई समाचार लेखेको आरोपमा प्रहरी टोलीले असोज ९ गते दुर्व्यवहार गरेको पीडितहरूले आरोप लगाएका छन् । पत्रकारद्वय आफ्नो कोठामा सुतेको अवस्थामा प्रहरीले घरबाट बाहिर निकाली सरकारी कार्यालयको समाचार लेख्ने भन्दै हातपात गरेको पवित्र शाहीले आरोप लगाए । महिला तथा बालबालिका कार्यालयमा कार्यालय समयमा कार्यालय प्रमुखको कार्यकक्षमा भएको मदिरा भोजको समाचार स्थानीय मिसन न्यूज साप्ताहिक र नागरिक दैनिकमा भदौ ३० गते प्रकाशन भएको थियो । आफूले उक्त समाचार प्रकाशन गरेपछि महिला विकास कार्यालय प्रमुखको अनुरोधमा प्रहरीले पिछा गरिरहेको पत्रकार शाहीले आरोप लगाए । जिल्ला प्रहरी कार्यालयका डीएसपी योगेन्द्र खड्काले झगडा भएको खबर पाएपछि टोली खटाइएको र पत्रकारलाई गिरफ्तार गर्ने कुनै योजना नभएको बताए । पीडितका अनुसार प्रहरीले सरकारी कार्यालयको समाचार लेख्ने भनेर कोठाबाट समातेर घिसारेका थिए । स्थानीय बासिन्दाहरूले निर्दोष व्यक्तिलाई यस्तो किन गरेको भनेपछि प्रहरीले उनीहरूलाई छाडेको पीडित पत्रकारले बताए ।