बैतडी, २१ भदौ - भारत जान लागेका ५ किशोर किशोरीलाई प्रहरीले मंगलबार बैतडीको सिमा नाका झुलाघाटबाट उद्धार गरेको छ । उद्धार गरिनेमा बैतडीको शिवलिंग -३ क शालिभन दमाईका १८ वर्षीय छोरा दिपक दमाई, थलाकाडा - ८ का जंगे दमाईकि १५ वर्षीय छोरी चनमती दमाई, महादेवस्थान -४ जसाउका गणेशदत्त पन्त, सोहि ठाउका हरिदत्त पन्तका १७ वर्षीय छोरा बसन्तराज पन्त र रामदत्त पन्तका १७ वर्षीय छोरा पुस्कर राज पन्त रहेको जिल्ला प्रहरी कार्यालय बैतडीका प्रहरी नायब उपरिक्षक बालनर सिंह राणाले जानकारी दिए । उनीहरुलाई प्रहरीले मंगलबार बैतडीको सिमा नाका झुलाघाटमा रहेको प्रहरीले शंका लागेर सोधपुछ गर्दा घरपरिवारलाई थाहा नदिई भारत जान लागेको खुलेपछि उद्धार गरिएको हो । उद्धार गरिएका किशोर किशोरीका घरपरिवारलाई सम्पर्क गरि घरपरिवारको जिम्मा लगाइने तयारी भईरहेको जिल्ला प्रहरी कार्यालय बैतडीले जनाएको छ । पछिल्लो समय बैतडीमा विद्यालय छोडेर भारत जाने किशोरकिशोरीको संख्या बढ्दै गईरहेको छ ।