शङ्खेश्वरी मावि बराहपोखरीमा कक्षा ६ मा अध्ययनरत कौशिला राईलाई फागुन ३ गते बेहेस् हुनेगरी लठ्ठीले कुटपिट गरेको आरोपमा सोही विद्यालयकी शिक्षिका कृष्णकुमारी रेग्मीविरुद्ध पीडित पक्षले फागुन ५ गते जिल्ला शिक्षा कार्यालयमा उजुरी दिएको छ । पीडित बालिकासहित सदरमुकाम दिक्तेलमा आएका अभिभावकले आरोपित शिक्षिकालाई कारबाही गर्न माग गर्दै शिक्षा कार्यालयमा निवेदन दिएका हुन् । आरोपितको कुटपिटबाट पीडित बालिकाको बाँया पाखुरा र गर्दनमा निलडाम लागेको पीडित बालिकाका बावु बज्रकुमार राईले बताए । ‘छोरीलाई बेहोस् हुनेगरी कुटपिट गरिएछ ।’-राईले भने-‘कुटपिट गर्नेलाई कारबाही हुनुपर्‍यो । हामीलाई न्याय दिनुपर्‍यो भनेर शिक्षामा निवेदन दिएका छौँ ।’ छात्रामाथि निर्घात कुटपिट भएको विरोधमा विद्यार्थीले विद्यालयमा ताला लगाएका छन् । शिक्षिकाविरुद्ध प्रशासनमासमेत निवेदन दिने राईले बताए । घटनाका विषयमा यथार्थ बुझ्न बाँकी रहेको निमित्त जिल्ला शिक्षा अधिकारी मीन थापाले बताइन् । सुनिता मगर