सदरमुकाम राजविराजमा बुधबार पुनः अर्को सकेट बम फेला परेको छ । राजविराज ५ स्थित लक्ष्मी इङ्गलिस बोर्डिङ् स्कुल अगाडि बिहान सकेट बम फेला परेपछि बिद्यार्थीको पठनपाठन प्रभावित भएको हो । स्कुल अगाडि अखिल तराई जनतान्त्रिक मुक्ति मोर्चा (क्रान्तिकारी) को रातो पर्चासहित सकेट बम फेला परेपछि पढ्न गएका बिद्यार्थी र स्थानीयवासी आतंकित भएका छन् । बम देखेपपछि स्कुलका कर्मचारीले पर्चासँगै कालो बट्टा देखेपछि प्रहरीलाई खबर गरेका थिए । प्रहरीले बमसँगै सो स्थानबाट जयकृष्ण गोईत नेतृत्वको मोर्चाको पर्चा बरामद गरेको प्रहरी नायव उपरीक्षक दानबहादुर कार्कीले बताए । श्री कृष्ण दल गण राजविराजबाट पुगेको सेनाको बम डिस्पोजल टोलीले उक्त बमलाई राजविराजस्थित रंगशालामा लगेर विहान ११ बजे निष्क्रिय पारेको छ । मंगलबार मात्र राजविराज ९ स्थित पिस जोन मोडल सेकेण्ड्री स्कुल र जुपिटर स्टेशनरी उद्योगका अगाडि रहेको फोहोरको डंगुरमा मोर्चको पर्चासहित फेला परेको बमलाई सेनाको टोलीले निष्क्रिय पारेको थियो ।