स्याङ्जा घर भइ बुटवल उमनपा-५, गोलबजार बस्ने रेडियो जागरणका समाचार प्रमुख ३९ वर्षीय टेकबहादुर मास्केलाई मोटरसाइकलमा आएका पाँच जनाको समूहले फागुन २३ गते राति रेडियोमा काम सकेर घर फर्कँदै गर्दा आक्रमण गरी घाइते बनाएका छन् । आक्रमणबाट घाइते भएका पीडित पत्रकारको उपचारका लागि लुम्बिनी अञ्चल अस्पताल लगिएको भएपनि समय लाग्ने भएको भन्दै स्थानीय पुष्पा फार्मेसीमा गरिएको पीडितले बताए । उनको दायाँ हात भाँचिएको छ भने शरीरका अन्य भागमासमेत चोट लागेको छ । फागुन २५ गते हुन लागिरहेको फोनिजको जिल्ला सम्मेलनमा ‘तँ उम्मेदवार हुने हैन ?’ भन्दै आक्रमणकारीले कुटपिट गरेको पीडितले बताए । नेपाल पत्रकार महासङ्घको टोली नै पुगेर इलाका प्रहरी कार्यालय बुटवलमा फागुन २४ गते घटनाका दोषीको पहिचान गरी कारबाही गर्न उजुरी दिएको छ । उजुरी आए लगत्तै घटनाको अनुसन्धान सुरु गरेको इलाका प्रहरी कार्यालय बुटवलका डिएसपी मुकुन्द मरासिनीले जानकारी दिए ।