संयुक्त मधेसी मोर्चाका कार्यकर्ताले रामनगर नगरपालिकामा लगाएको बोर्ड हटाएका छन् । संविधान संशोधन नगरी सरकारले नयाँ स्थानीय तहको घोषणा गरेर निर्वाचनको तयारी थालेको भन्दै मोर्चाले जिल्लाको दक्षिणी क्षेत्रका नगरपालिका र गाउँपालिकामा पुगेर बोर्ड हटाएको हो । मोर्चाका संयोजक मुकुरजी गिरीका अनुसार जिल्लाको महेसपुरबाट मोटरसाइकल र्‍यालीसहित सबै स्थानीय तहमा पुगेर विरोध प्रदर्शन गरेको छ । चुनाव बहिष्कार अभियानअन्तर्गत बुधबार जिल्लामा लाठीसहितको मोटरसाइकल र्‍याली निकालेको छ । मोर्चाले सीमावर्ती क्षेत्र महेसपुरबाट करिब हजार मोटरसाइकलको संख्यामा निकालेको र्‍याली बेलासपुर, उजैनी, मन्झरिया हुँदै सदरमुकाम परासीको जिल्ला प्रशासन कार्यालय अगाडि विरोध प्रदर्शन गरेको थियो ।