पति हत्याको आरोपमा कालिकोटको महावै गाउँपालिका–५ कि १६ वर्षिया धनकला विकलाई प्रहरीले पक्राउ गरेको छ । २३ वर्षीय पति नरेन्द्र विकलाई हत्या गरेको आरोपमा शनिबार प्रहरीले धनकलालाई पक्राउ गरेको हो । चैत ५ गते खाँडाचक्र नगरपालिका–८ स्थित ससुराली घरमा आएका बेला खाँडाचक्र नगरपालिका–९ का १८ वर्षीय रमेश विकसँग मिलेर धनकलाले हत्या गरेको आरोपमा उनलाई पक्राउ गरेको प्रहरीले जनाएको छ । आरोपी रमेशसँग विवाह गर्ने उद्देश्यले हत्या गरी खोल्सामा फालेको धनकलाले प्रहरी समक्ष स्वीकार गरेको प्रहरी प्रमुख ‘डिएसपी’ योगेन्द्र खड्काले बताउनुभयो । हत्याका अर्का आरोपित रमेश विक फरार छन् । एक हप्ता अगाडि हराएका मृतक नरेन्द्रको शव चैत ११ गते खाँडाचक्र नगरपालिका–८ छायढुस्की भन्ने ठाउँको खोल्सामा भेटिएको थियो ।