सप्तरीको जमुनी मधेपुरा गाविसको पर्साहीमा रहेको विद्यालयमा तोडफोड गर्ने दुईजना दाजुभाइलाई स्थानीयबासिन्दाले पक्राउ गरि प्रहरीको जिम्मा लगाएको छ । पक्राउ पर्नेमा स्थानीय जितेन्द कुमार यादव र धमेन्द कुमार यादव रहेका छन् । दुवै दाजुभाइले मादक पदार्थ सेवन गरी आधारभूत विद्यालयको वाउण्डी वाल र कक्षाकोठाको वाल तोडफोड गरेका छन् । विद्यालयका प्रधानाध्यापक नरेशकुमार यादवले दिएको जानकारी अनुसार मंगलबार राति मादक पदार्थ सेवन गरी दुवै दाजुभाइले विद्यालयमा तोडफोड गरेका छन् । विद्यालयमा यसअघि पनि पटक पटक यस्ता तोडफोडका घटना भइसकेको बताउँदै विद्यालय व्यवस्थापन समितिका अध्यक्ष ब्रह्मदेव यादवले पक्राउ परेका दाजुभाइलाई कडा कारवाही र क्षतिपुर्तिको माग समेत गरेका छन् । यता सप्तरीका एसपी अनुराग दिवेदीले पक्राउ परेका दाजुभाइलाई थुनामा राखि कारवाही प्रकृया अगाडि बढाईएको उनले जानकारी दिएका छन् ।