चाँगुनारायण नगरपालिका–२ दुवाकोटस्थित राप्रपाको जिल्ला सदस्य माधव खत्रीको घर नजिकको पर्खालमा अज्ञात समूहले ग्यासको सिलिन्डर विस्फोट गराएको छ । शुक्रबार बिहान करिब ३ बजे अज्ञात समूहबाट भएको सिलिन्डर बम बिस्फोटबाट खत्रीको दुईवटा घरको १२ वटा सिसा फुटेको प्रहरीले जनाएको छ । मानवीय क्षति भने नभएको महानगरीय प्रहरी परिसर भक्तपुरका प्रवक्ता डीएसपी कृष्ण प्रसाईंले बताए । सिलिन्डर विस्फोट भएको स्थानमा ग्यासको पिँधको केही भाग छरिएको अवस्थामा फेला परेको उनले बताए ।