Pratap Bishta मकवानपुर । जेठ १६ गते बीस वर्षअघि मितीनीलाई भारतको वेश्यालयमा लगेर बिक्री गर्ने एक महिलालाई जेठ १४ गते प्रहरीले गिरफ्तार गरेको छ । भैँसे गाविस-८ की एक युवतीलाई भारतको वेश्यालयमा बिक्री गरेको आरोपमा हेटौँडा नगरपालिका -९ की ३९ वर्षीया गोरीमाया स्याङ्तानलाई २० वर्षपछि प्रहरीले गिरफ्तार गरेको हो । स्याङ्तानले १८ वर्षीया एक युवतीलाई २०५० माघ १० गते बीरगन्जमा घर हेर्न जाउँ भनेर फकाएर बीरगञ्ज हुँदै भारत लगेर ३० हजार भारुमा बिक्री गरेकी थिइन् । भारतको बेश्यालयबाट ११ महिनापछि भाग्न सफल भएर आएकी ती युवतीले मितिनी गोरीमाया र पासाङकाविरुद्ध २०५१ चैत ३० गते प्रहरीमा उजुरी दिएकी थिइन् । पासाङ लामा फरार छन् । उनी गाडी चालक हुन् । गोरीमायाले मितिनीलाई भारतमा लगेर बिक्री गरेको प्रहरी समक्ष साविती बयान दिएकी छन् । वेश्यालयवाट ११ महिनापछि फर्केर आएकी युवतीले भैँसे गाविसको एक युवकसँग विवाह गरेकी थिइन् । वेश्यालयबाट फर्कँदा उनले आफ्नो रगतमा एचआईभी/एड्सको जीवाणु बोकेर आएकी थिइन् । त्यही जीवाणुको कारण उनको विवाह गरेको सात वर्षपछि मृत्यु भयो । पतिको पनि एचआईभी एड्सकै कारण विवाहको नौ वर्षपछि उनको निधन भएको थियो । प्रताप विष्ट