स्थानीय तह मतदान भइरहेका बेला इलामको इलाम नगरपालिका–७ स्थित आदर्श आधारभूत विद्यालयको मतदान केन्द्रमा बम विष्फोट भएको छ । विष्फोटबाट कुनै मानवीय क्षति नभएको प्रमुख जिल्ला अधिकारी जनकराज दाहालले बताए । ‘अहिले १० बजेर २० मिनेटमा यहाँ बम विष्फोट भएको हो । तर, कुनै हताहती भएन,’ उनले नागरिकन्युजसँग भने, ‘जिल्लाका अन्य सबै मतदान केन्द्रमा शान्तिपूर्ण रूपमा मतदान भइरहेको छ ।’ बम विष्फोट कसले गरायो भन्नेबारे अनुसन्धान भइरहेको उनले बताए । नेपाली सेनाको टोलीले विष्फोटस्थलको अवलोकन गर्दैछ भने अहिले मतदान पुनः चालू भइसकेको छ ।