सर्लाहीको दक्षिणी भेगमा पर्ने बलरामा आइतबार बिहान सुतली बम बिष्फोट हुँदा एक बालिका घाईते भएकी छन् ।
भारतीय सीमा नजिकै पर्ने बलरा नगरपालिका–२ हथियौल जमुनिया टोलमा भएको बम बिष्फोटमा परि सोही ठाउँका जय प्रकाश सहनीकी १० वर्षीया छोरी रस्मिता सहनी घाईते भएकी हुन् ।
बमको छर्राले लागेर सामान्य घाईते भएकी बालिकाको प्राथमिक स्वास्थ्य केन्द्र अचलगढमा उपचार भैरहेको छ । आफ्नै किराना पसल अगाडि जय प्रकाशकी छोरी रस्मिता र छोरा रितेस खेलिरहेको अवस्था आइतबार बिहान ११ बजेतिर सुतली बम बिष्फोट भएको ईलाका प्रहरी कार्यालय गडहियाले जनाएको छ ।
बालबालिका खेल्ने क्रममा पसल अगाडि फेला परेको बेवारिसे झोला उठाएर घर लान खोज्दा बम बिष्फोट भएको गाउँलेहरुले बताएका छन् ।
झोला भित्र रहेका ४ वटा बम मध्ये एउटा बालबालिका खेलाउँदा पडकिएको र बाँकी तीन वटा नेपाली सेनाले निष्क्रिय पारेको गडहियाका प्रहरी निरीक्षक रामराजा केशरीले जानकारी दिए । उहाँका अनुसार बम राख्ने व्यक्तिको खोजी तीव्र पारि घटना स्थल वरपर सुरक्षा सतर्कता बढाईएको छ ।
भारतसँग सीमा जोडिएको बलरा क्षेत्र सुरक्षाको दृष्टिले सर्लाहीको अति नै संवेदनशील ठाउँ मानिन्छ । चुनावका लागि त्यसक्षेत्रमा प्रहरी नायब उपरीक्षक रुगम कुँवरको नेतृत्वमा केही दिन अघि देखि नै ठुलो संख्यामा सुरक्षाकर्मी परिचालन भैरहेका छन् । शनिवार मात्रै बलरा नगरपालिकाका विभिन्न ठाउँमा रहेका मतदान केन्द्रमा तालिम प्राप्त कुकुरहरुबाट खतरा रहे–नरहेका बारेमा बुझिएको थियो ।