सोमबार राति यहाँका एकजना व्यवसायीलाई गोली हानेर भाग्दा भाग्दै भारतीय नागरिक पक्राउ परेका छन् । सिद्धार्थ नगरपालिका–५ बैंकरोडस्थित सैन्य क्याम्प अगाडि उद्योव वाणिज्य संघका सदस्य हरिस सेठियामाथि गोली हानेर भाग्दै गरेका ५५ वर्षीय भारतीय नागरिक रमजान मुसलमानलाई स्थानीयले समात्न सफल भएका हुन् । भारतीय मोटरसाइकल पछाडि बसेर आएका रमजानले बैंक रोडमा हिँडिरहेको अवस्थामा मोबाइल तथा विद्युत्तीय सामाग्री व्यवसायी सेठियामाथि कटुवा पेस्तोलबाट गोली हानेका थिए । गोली हानेर भाग्दै गरेको अवस्थामा बैंकरोडका स्थानीयले भारतीय राज्य उत्तरप्रदेशस्थित जिल्ला महाराजगञ्ज, थाना सुनौलीको जारा गाउँ निवासी रमजानलाई कटुवा पेस्तोलसहित समातोका हुन् । संघीय इकाइ प्रहरी कार्यालय भैरहवाका एसएसपी दीपक थापाका अनुसार सेठियामाथि गोली हानिएको स्थान नजिकै उनी कटुवा पेस्तोलसहित समातिएका हुन् । प्रहरीले सुरुवाती अनुसन्धानमा उनैले गोली हानेको जनाएको छ। भारतीय नम्बरको मोटरसाइकल चालक भने फरार भएको प्रहरीले जानकारी दिएको छ । सुनौली भारतको व्यापारिक तथा सीमावर्ती सहर पनि हो । उनलाई स्थानीयले समातेर जिल्ला प्रहरी कार्यालयको टोलीलाई बुझाएका थिए । रमजानको सिद्धार्थनगरस्थित अस्पतालमा स्वास्थ्य परीक्षण गरिएको छ । स्थानीयले समात्ने क्रममा रमजानमाथि कुटपिट पनि गरेका थिए ।