स्थानिय तहमा समायोजनको माग गर्दै प्रदेश २ का सामाजिक परिचालक आन्दोलित भएका छन् । गत असारबाट हटाइएका सामाजिक परिचालकहरुले विभिन्न चरणको आन्दोलन गर्दै मुख्यमन्त्रिको कार्यालय घेराउ गरेका छन् । प्रदेशका पर्सादेखि सप्तरीसम्मका सामाजिक परिचालकहरु जनकपुरमै जम्मा भई ३ दिनदेखि निरन्तर रुपमा २ घण्टा मुख्यमन्त्रिको कार्यालय घेराउ गर्दै आएको सामाजिक परिचालक संघर्ष समितिका अध्यक्ष शिवशंकर मेहताले जानकारी दिए । प्रदेश २ मा ८ सय ५४ सामाजिक परिचालकहरु छन । लामो समयदेखि सामाजिक परिचालक भई स्थानिय तहमा जनप्रतिनिधि र कर्मचारीविहीन भएको बेला काम गरेको तर, अहिले आएर त्यही सामाजिक परिचालकहरुलाई हटाउँदा अन्याय भएको सिरहाबाट आन्दोलनमा आएकी सुरेखा महतोले गुनासो गरिन् । संघर्ष समितिका अध्यक्ष मेहताले सामाजिक परिचालकहरुलाई नेपाल सरकारले पूर्ण सेवा सुविधा उपलब्ध गराई हाललाई कार्यालय सहायकमा म्यादमा समायोजन गरिनुपर्ने बताए । स्थानिय तहमा सामायोजनपछि योग्यताको आधारमा एक पटक उमेर हद नलाग्ने गरी दरबन्दी सृजना गरी स्थानीय तह कर्मचारीमा समावेश गरिनुपर्ने माग राख्दै आन्दोलित भएको उनले बताए । सामाजिक परिचालकहरुले आफूहरुको माग प्रदेश सरकारले सुनवाइ नगरे आमरण अनसन बस्ने चेतावनी दिएका छन् ।