गस्तीमा गएको प्रहरीलाई दुर्व्यवहार गरेको आरोपमा अछाम प्रहरीले दुई जनालाई गिरफ्तार गरेको छ ।

साँफेबगर नगरपालिका–३ निवासी २५ वर्षीय दशरथ कुँवर र वडा नम्बर ४ का २३ वर्षीय विक्रम कुँवरलाई प्रहरीलाई दुर्व्यवहारको आरोपमा नियन्त्रणमा लिएर सार्वजनिक अपराधको मुद्दामा कारवाही प्रक्रिया अघि बढाएको अछाम प्रहरीले जानकारी दिएको छ ।

पुस १५ गते बेलुकी सोही नगरपालिकाको जिजाडी खोला नजिक रहेको खप्तड रिसोर्टमा डोटीबाट शैक्षिक भ्रमणमा आएका सेती प्राविधिक शिक्षालयका विद्यार्थीहरूसँग विवाद छुटाउन गएका प्रहरीलाई दुर्व्यवहार गरिएको अछाम प्रहरीको भनाइ छ ।

कुँवरद्वयलाई सम्झाएर पठाउन खोज्दा इलाका प्रहरी कार्यालय घुगुरकोटकाको टोलीलाई दुर्व्यवहार गरेको जिल्ला प्रहरी कार्यालय अछामका डिएसपी जनकबहादुर शाहीले जानकारी दिए ।

कर्तव्य पालना गर्ने कार्यमा प्रहरीमाथि जोरजुलम गरी बाधा पुर्याउने भन्दै ती दुई जनालाई मुलुकी फौजदारी अपराध (संहिता) ऐन २०७४ को दफा ८५ बमोजिमको कारवाही प्रक्रिय अघि बढेको अछाम प्रहरीले जानकारी दिएको छ । दुर्व्यवहारमा संलग्न भइ फरार रहेका थप व्यक्तिहरूको खोजी भइरहेको बताइएको छ ।