भक्तपुर, ७ भदौ 

भक्तपुर नगरपालिका-९ च्यामासिंहस्थित डिउटीमा खटिएको प्रहरीमाथि हातपात गरी अभद्र व्यवहार गरेको अभियोगमा २ जनालाई शुक्रबार राति प्रहरीले पक्राउ गरेको छ । पक्राउ पर्नेहरुमा काभ्रे नमवुद्ध नगरपालिका-९ घर भई हाल भक्तपुर सुडाल बस्ने २६ वर्षीय सरोज दाहाल र सल्यान त्रिवेणी गाउँपालिका-५ घर भई हाल भक्तपुर सुडाल बस्ने २२ वर्षीय अजय राउत रहेका छन् । मादक पदार्थ सेवन गरेका उनीहरुले डिउटीमा खटिएको प्रहरीलाई हातपात गरे पश्चात प्रहरीले पक्राउ गरेको हो ।     यस सम्बन्धमा प्रहरीले आवश्यक अनुसन्धान गरिरहेको छ ।