२२ भदौ, गुल्मी । गुल्मीको इस्मा गाउँपालिका-२ का एकजना युवकको हत्या भएको छ । वडानम्बर- १ स्थिति हस्तिचौरको छिन्ना खेलामा होटेल सञ्चालन गर्दै आएका २३ वर्षीय मोतीबहादुर कुँवरको हत्या भएको जिल्ला प्रहरी कार्यालय गुल्मीका प्रमुख, प्रहरी उपरीक्षक (एसपी) प्रविणलाल श्रेष्ठले जानकारी दिए ।

मोती र उनका दाजु यमबहादुर कुँवरले होटेल छिन्ना खोलामा सञ्चालन गर्दै आएका थिए । मृतकका दाइ सोमबार बिहान आउँदा भाइलाई रगताम्य र अचेत अवस्थामा फेला पारेका थिए ।

अचेत अवस्थामा उनलाई गुल्मी अस्पताल तम्घास ल्याएको भए पनि केही समयपछि मृत्यु भएको प्रहरीले जनाएको छ । मृतक कुँवरको टाउको र शरीरको अन्य भागमा चोट छ ।

होटेलबाट ३५ हजार नगद, १० हजार बराबरको एनसेलको रिचार्ज कार्डलगायत सामान पनि चोरी भएको प्रहरी उपरीक्षक (एसपी) प्रविणलाल श्रेष्ठले जानकारी दिए ।

मोतीको कुटपिटबाटै ज्यान गएको हुनसक्ने भन्दै प्रहरीले थप अनुसन्धान सुरु गरेको जनाएको छ ।

Update

हत्याको आठ महिनापछि अभियुक्त पक्राउ

गुल्मी । गुल्मीमा हत्याको सात महिनापछि अभियुक्त सार्वजनिक गरिएको छ । जिल्लाको इस्मा गाउँपालिका –१ छिनुवामा आफ्नै पसलमा कुटपिट गरि हत्या गरिएका मोति बहादुर कुवँरको हत्यामा संलग्न अभियुक्तलाई प्रहरीले आइतबार पत्रकार सम्मेलनमार्फत सार्वजनिक गरेको हो ।

घटनामा संलग्न इस्मा गाउँपालिका –१ का १८ बर्षिया रमेश कुमाल, अर्का १८ बर्षिया सन्तोष कुमाल र सोही ठाउँकै २० बर्षिया सुशील कुमाललाई सार्वजनिक गरिएको जिल्ला प्रहरी कार्यालयका सूचना अधिकारी पुरूषोत्तम प्रसाद पाण्डेले जानकारी दिए ।

कुवँरलाई गत बर्षको भदौ २१ गते आफ्नै पसलमा तीनजना मिलेर कुटपिट गरि हत्या गरेको स्वीकारेका छन् । वैशाख १७ गते पक्राउ परेका उनीहरूलाई जिल्ला अदालतबाट म्याद थप गरि घटनाको बिषयमा अनुसन्धान भइरहेको सुचना अधिकारी पाण्डेले बताए ।