बैतडी, २३ भाद्र ।  बैतडीको सिगास गाउँपालिका वडा ३ स्थित आधारभुत स्वास्थ्य केन्द्रका स्वास्थ्यकर्मी भुपेन्द्र बोहरामाथि कुटपिट भएको छ । सोमबार वडा नं ५ ढुङ्गाडमा स्वाब संकलन गर्न गएका स्वास्थ्यकर्मी बोहरामाथि रक्सी सेवन गरी वडा नं ३ कै मानसिंह बोहराले कुटपिट गरेका हुन् ।

महामारीको समयमा भीडभाड नगर्न आग्रह गर्दा रक्सी सेवन गरेका मानसिंहले उनलाई कुटपिट गरेको सिगास गाउँपालिकाका स्वास्थ्य साखा प्रमुख घनश्याम बोहराले जानकारी दिनुभयो । उहाँका अनुसार प्रहरीलाई यसबारे जानकारी भइसकेको र आज कुटपिट गर्ने व्यक्तिलाई पक्राउ गरी कार्वाही प्रक्रिया थालिने बताइएकाे छ ।

क्वारेन्टाइनमा रहेकाहरुको स्वाब संकलन गर्न गएका स्वास्थ्यकर्मीमाथि कुटपिट भएपछि स्वाब संकलन कार्य प्रभावित बनेको छ । यसअघि पनि जिल्लाका केही स्थानीय तहमा स्वास्थ्यकर्मीमाथि यसरी नै दुर्व्यवहार भएकाे थियाे ।