सिक्टा मावि, राजपुरमा कक्षा १० मा अध्ययनरत छात्राहरू लमही नपा–९ की १५ वर्षीया सोमा कुमाल, १८ वर्षीया सर्मिला कुमाल र राजपुर गाउँपालिका –७ की १६ वर्षीया सर्मिला नेपालीलाई टेष्ट परीक्षाको गणित विषयमा नम्बर नल्याएको आरोपमा कुटपिट गरेको भन्दै शिक्षक  ३७ वर्षीय हेमराज विक विरूद्ध पीडितपक्षले फागुन २ गते इलाका प्रहरी कार्यालय, गढवामा उजुरी दिएका छन् ।

विद्यार्थीहरूलाई गणित विषयमा शून्य नम्बर आएको भन्दै कक्षा कोठामै शिक्षक विकले माघ २२ गते पाइपले  कुटपिट गरेको उजुरी आएको इलाका प्रहरी कार्यालयका इन्स्पेक्टर राजकुमार भट्टले बताउनु भयो । भट्टका अनुसार फागुन ३ गते विद्यालयमा छलफल भइरहेको छ ।

कुटपिटबाट  सर्मिला कुमाल उठ्न बस्न नसक्ने अवस्था भएपछि माघ २३ गते लमही अस्पतालमा उपचार गरिएको अभिभावक नरेश कुमालले बताउनु भयो । कक्षामा ४७ जना विद्यार्थी रहेको र ती मध्ये एकजना बाहेक सबैलाई कुटपिट गरेको घाइते विद्यार्थी सोमा कुमालले बताउनु भयो ।

घटनाबारे विद्यार्थीहरूले घरमा नभनेको तर विद्यार्थीहरूले खिचेको भिडियो माघ ३० गते सामाजिक सञ्जालमा सार्बजनिक भएपछि थाहा पाएको अभिभावक नरेश कुमालले बताउनु भयो ।

शिक्षक विश्वकर्माले पढ्दा ध्यान नदिने र सुध्रेलान भनेर सामान्य कुटपिट गरेको बताउनु भयो । राजपुर गाउँपालिका अध्यक्ष लोकराज केसीले बालबालिका कुटपिट गरेको भिडियो फेसबुकमा देखेको तर अभिभावकहरूबाट कुनै गुनासो नआएको बताउनु भयो । उहाँले  विद्यार्थी कुटपिट गर्ने शिक्षकलाई कारबाही हुने बताउनु भयो ।

जयनारायण पुन

[Update]

विद्यार्थीमाथि निर्घात कुटपिट गर्ने शिक्षक पक्राउ

कम नम्बर ल्याएको भन्दै निर्घात रूपमा विद्यार्थी कुटपिट गर्ने शिक्षक पक्राउ परेका छन्।

जिल्लाको राजपुर गाउँपालिका वडा नं. ७ स्थित माध्यामिक विद्यालय सिक्टामा गणित र विज्ञान विषय पढाउँदै आएका राहात कोटाका शिक्षक हेमराज बिक पक्राउ परेका हुन्।

जिल्ला प्रहरी कार्यालय दाङका प्रवक्ता डिएएसपी मुकुन्दप्रसाद रिजालका अनुसार शिक्षक बिकलाई अभिभावकको जाहेरीका आधारमा फागुन ३ गते दिउँसो पक्राउ गरिएको हो।