कालीकोटको पलाता गाउँपालिका-१ मा रहेको गणेश आधारभूत विद्यालयमा पालिका अध्यक्ष लक्ष्मणबहादुर बमले आइतबार ताला लगाइदिएका छन् । विद्यालयमा ताला लगाइदिएपछि आजबाट शुरू हुने कक्षा ८ को परीक्षा अन्यौलमा परेको छ ।

विद्यालय व्यवस्थापन समितिका कार्यवाहक अध्यक्ष मनप्रसाद न्यौपानेले पालिका अध्यक्ष दलबलसहित विद्यालय आएको र २ वटा कोठामा ताला लगाइदिएको बताए ।
लक्ष्मणबहादुर बम (पलाता गाउँपालिका अध्यक्ष)

‘अध्यक्ष ज्यू दलबलसहित विद्यालयमा आउनु भएछ । उहाँले गाउँलेले खाडा आगालागीमा आफूहरुलाई साथ नदिएको, भ्रष्टाचार गरेको आरोप लगाएको भन्दै आफैंले बनाइदिएको विद्यालयमा ताला हान्नु भयो । अहिले चार जना भन्दा बढी विद्यार्थीको झोला पनि कक्षाकोठामा छ ’, उनले भने, ‘खाडा आगलागी भएको समयमा विद्यालयमा चार कोठा थिए । अध्यक्ष आफैंले यहाँ आएर छत्र बमलाई ठेक्का दिएर २ कोठे कच्ची भवन बनाउन लगाउनु भयो । त्यो निर्णय विव्यसले गरेको छैन ।’

जनप्रतिनिधिले नै विद्यालयमा तालाबन्दी गर्नु गलत भएको भन्दै अभिभावकहरूले ताला खोल्न दबाब दिएका छन् ।
विद्यालयका प्रधानाध्यापक सर्प न्यौपानेले विद्यालयमा ताला लगाउनुको कारण आफूहरूलाई थाहा नभएको बताए । न्यौपानेले भने, ‘उहाँले विद्यार्थीलाई बाहिर निकालेर कक्षा कोठामा ताला लगाउनु भएको हो ।’

अध्यक्ष बममाथि अधिकारको दुरुपयोग गर्दै आइरहेको, मनोमानी रूपमा बजेट खर्च गरिरहेको, आफन्त तथा आफ्ना आमाबुवाको असपतालको नाममा पालिकाले तिर्ने भन्दै सात वटा मोटरसाइकल खरिद गरेको स्थानीयको गुनासो छ ।

गाउँपालिकाका उपाध्यक्ष दाना न्यौपानेले आफू उपचारको क्रममा नेपालगञ्जमा रहेको बताउँदै तालाबन्दी भएको बारेमा केही जानकारी नभएको बताईन् ।

‘त्यो विद्यालय मेरै गाउँको हो । तालाबन्दी भएको बारेमा मलाई कसैले पनि जानकारी दिएका छैनन् । अध्यक्षले तालाबन्दी किन गरे भन्ने खासै बुझ्न पाएको छैन । मैले तालाबन्दी भएको कुरा तपाईंमार्फत जानकारी पाएँ ’, उनले भनिन् ।