१० पुस, जनकपुरधाम । महोत्तरीको सम्सी गाउँपालिकामा एक जना श्रमिकको हत्या भएको छ । हत्या हुनेमा सम्सी गाउँपालिका २ पर्सादेवाडका ४९ वर्षीय मोहम्मद खुर्सैद अन्सारी छन् ।

अन्सारीको हत्याको आरोपमा प्रहरीले पर्सादेवाडकै ३५ वर्षीय मो. अब्दुल सलामलाई पक्रेको छ ।

सलामले खुर्सैदलाई चरम यातना दिएर हत्या गरेको प्रहरीले जनाएको छ । सलामले यातना दिँदै गरेको भिडियोसमेत प्रहरीले फेला पारेको छ ।

मृतक खुर्सैदका भाइ मो. समजन अन्सारीका अनुसार बुधबार बिहानै ६ खुर्सैदलाई घरको काम गर्न भनि अब्दुलले बोलाएर लगेका थिए । चारदिन अघि मात्र १५ हजार रुपैयाँ मासिक तलब पाउने गरी खुर्सैदले अब्दुलको घरमा काम समातेका थिए ।

बुधबार दिउँसो ३ बजे खुर्सैदलाई अर्ध नग्न एवं गम्भीर अवस्थामा घरबाहिर दैलोमा फालेपछि स्थानीयबासिन्दाले थाहा पाएका थिए । खुर्सैदलाई तत्कालै आफन्तजनले उपचारको लागि अस्पताल लगेका थिए । खुर्सैदको जनकपुरको जानकी हेल्थकेयरमा उपचारकै क्रममा आइतबार मृत्यु भएको छ ।

प्रहरीले घटना भएकै दिन घटनास्थल पुगेर मो.अब्दुललाई नियन्त्रणमा लियो । नशामा लठ्ठ भएका कारण उनलाई नियन्त्रणमा लिन पनि प्रहरीलाई हम्मे हम्मे परेको थियो । उनले लठ्ठी, मुका, लात लगायतले कुटपिट गरेका थिए भने पेट्रोल खन्याएर मलद्वारमा आगो लगाएका थिए ।

उनलाई सोही दिन इलाका प्रहरी कार्यालय गौशालाले पक्राउ गरेको महोत्तरीका प्रहरी उपरीक्षक कृष्ण पंगेनीले बताए ।

अब्दुल यसअघि पनि दुईपटक लागूऔषध मुद्दामा पक्राउ परेर छुटेको स्थानीय बताउँछन् । पहिलाको मुद्दा विषयमा सुनेको तथ्य खोजिरहेको एसपी पंगेनीले बताए । पहिला नै प्रहरीले पैसा खाएर अपराधी अब्दुललाई पटक पटक छाडेको कारण यस्तो जघन्य अपराध गरेको स्थानीयबासिन्दाको आरोप छ ।

मृतक खुर्सैदको घरको आर्थिक अवस्था कमजोर रहेकाले आफ्नो थोरैखेतीपाती र ज्यालादारी गर्दै आएका थिए । उनका चार छोरी र दुई छोरासहित ६ सन्तान छन् ।