मजदुरमाथि निर्घात कुटपिट गर्ने मोरङको विराटनगर महानगरपालिका–४ का १९ वर्षीय आयुष भेटवाल, कुशल भेटुवाल र रोशन कार्कीविरुद्ध प्रहरीले ज्यान मार्ने उद्योगमा मुद्दा दर्ता गरेको छ । आरती स्टिल उद्योगका मजदुर २७ वर्षीय पवन साहलाई उनीहरूले सांघातिक आक्रमण गरी बेहोस बनाई सडक किनारमा फालेर भागेका थिए । प्रहरीले आयुषलाई पक्राउ गरिसकेको छ । कुशल र रोशन भने फरार छन् ।

स्टिल उद्योगमा कार्यरत साह काम सकेर सधैँझैँ साइकलमा विराटनगर महानगरपालिका– ६ स्थित घर फर्कँदै थिए । २० असार साँझ ८ बजेतिर विराटनगर– ४ स्थित कोसी राजमार्ग दूध फारम चोकमा पुग्दा उनीमाथि कुटपिट भएको थियो । बा.१५च ३४४५ नम्बरको कारमा सवार विराटनगर– ४ का १९ वर्षीय आयुषले साइकल रोक्दै साहको कन्चटमा मुक्का प्रहार गरे ।

साह सडकमै ढले, अचेत भए । सिसिटिभीको फुटेज हेर्दा भेटवालले कारमा रहेका अर्का व्यक्तिलाई बोलाएर साहलाई घिसारेर सडक–किनारमा ल्याएर छाडेको देखिन्छ । साहमाथि मुक्का प्रहार भएको घटनाको सिसिटिभी फुटेज सामाजिक सञ्जालमा सार्वजनिक भएपछि प्रहरीले आयुषसहित उनका भाइ १८ वर्षीय कुशल र तेह्रथुम घर भएका ३० वर्षीय रोशनविरुद्ध ज्यान मार्ने उद्योगमा मुद्दामा उजुरी दर्ता गरेर अनुसन्धान थालेको छ ।

अझै केही दिन तपाईहरुले नयाँ पत्रिकाका सम्पूर्ण सामग्री लगअन गरेर नि:शुल्क हेर्न सक्नुहुनेछ ।