अमृत साइन्स क्याम्पसमा दुई विद्यार्थी संगठनबीच झडप भएको छ। झडपमा अनेरास्ववियुका पाँच जना घाइते भएका छन् भने अखिल क्रान्तिकारीका दुई जना घाइते भएका छन्। अनेरास्ववियुका विद्यार्थीहरुले क्याम्पस प्रमुखकको कुर्सीमा आगजनी गर्न खोजेपछि सम्झाउन पुगेका क्रान्तिकारी विद्यार्थीबीच झडप भएको क्रान्तिकारीका विद्यार्थी नेता दिपेश पुनले बताए। अनेरास्ववियुले क्याम्पस प्रमुखको कोठामै पुगी तोडफोड गर्नुका साथै क्याम्पस प्रमुखकको कुर्सी जलाएका हुन्। तोडफोड गर्ने एक जनालाई प्रहरीले पक्राउ गरेको छ। क्याम्पसमा शान्ति सुरक्षा कमजोर र नियमित पढाइ नभएपछि क्याम्पस प्रमुखको राजीनामा माग्नुपरेको अनेरास्ववियुका विद्यार्थी नेता गोपाल नेपालले बताए। उनका अनुसार आज बिहानमात्र क्याम्पस परिसरमै खुकुरी प्रहार भएको थियो। नेपालका अनुसार अहिले क्याम्पस प्रशासन र विद्यार्थीहरुबीच वार्ता भइरहेको छ। अमृत साइन्स क्याम्पस प्रमुख राजेश महाजु एमाओवादी निकट हुन्।