थरुहट माग गर्दै आन्दोलनरत् थारुहट संयुक्त संघर्ष समितिको अगुवाईमा नेपालगन्ज उद्योग वाणिज्य संघमा तालाबन्दी गरिएको छ । थरुहट संघर्ष समिति र मधेसवादी दलहरुको संयुक्त मोर्चाले संघमा तालाबन्दी गरेको हो । संघका अध्यक्ष कृष्ण प्रसाद श्रेष्ठ, केन्द्रीय सदस्य सुनिलकुमार शर्मा लगायतका पदाधिकारीहरुलाई कार्यकक्ष भित्रै थुनेर संघमा तालाबन्दी गरिएको हो । संघीय समाजवादी फोरमका केन्द्रीय मो. इस्तियाक राईको नेतृत्वमा गएको टोलीले साझ साढे ६ बजेतिर संघमा तालाबन्दी गरेको हो । पदाधिकारीहरुलाई थुनेपछि आन्दोलनकारीहरुले त्रिभुवनचोकमा नाराबाजी र विरोध सभा गरेका छन् । संघले शुक्रबार मात्रै मध्यपश्चिमलाई अखण्ड राखेर प्रादेशिक राजधानी बाकेलाई बनाउनु पर्ने माग सहित धारणा सार्वजनिक गरेको थियो । त्यसको विरोधमा तालाबन्दी गरिएको संघका वरिष्ठ सदस्य समेत रहेका तराई मधेस लोकतान्त्रिक पार्टीका नेता ललित रौनियारले जानकारी दिए ।