विराटनगर उमनपा -१५ स्थित एस लाल पम्पमा भदौ १३ गते सुतली बम विष्फोट हुँदा पेट्रोल लिन लाइनमा बसेका तीन जना घाइते भएका छन् । अपरिचित व्यक्तिहरू आएर सुतली बम विष्फोट गराउँदा विराटनगर उमनपा- १३ का २४ वर्षीय निरज साह, ठाउँका २५ वर्षीय अजय पाण्डे र सोही उमनपा -१५ का ३० वर्षीय तपेस दास घाइते भएको प्रहरीले जनाएको छ । घाइते मध्ये साहको दाहिने हातमा चोट लागेको, दासको आँखा नजिक चोट लागेको र पाण्डेको ढाडमा चोट लागेको छ । कोशी अञ्चल अस्पतालमा साहको, विराट आँखा अस्पतालमा दासको र मोरङ सहकारी अस्पतालमा पाण्डेको उपचार भइरहेको छ । घटनामा संलग्नहरूको खोजी कार्य भइरहेको छ भने घटनाको विषयमा थप अनुसन्धान अगाडि बढाएको जिल्ला प्रहरी कार्यालय मोरङका प्रवक्ता डिएसपी प्रमोद खरेलले जानकारी दिए ।