सेढवा गाविस- ६ निवासी ४० वर्षीया रीतादेवी साहलाई छिमेकी ४५ वर्षीया सरीतादेवी, ४० वर्षीया शीलादेवी, १७ वर्षीया रीनाकुमारी साह, २१ वर्षीया गुडियाकुमारी साहलगायतले भदौ १३ दिउँसो बोक्सीको आरोपमा दुर्व्यवहार गरेका छन् । नेपाली काङ्ग्रेसका सेढवा बुथ इकाईका सभापति सत्यनारायण साहको परिवारमा उनकी भतिजी २० वर्षीया गुडीकुमारी साह बेलाबेलामा बेहोस हुने रोगबाट पीडित छन् । साह परिवारले छोरी बोक्सीको टुनामुनाका कारण बिरामी भएको ठानी छिमेकी रीतादेवीलाई बोक्सी लगाई दिएको भन्दै हिजो दिउँसो उनकै घरमा पसेर भूतालेको पीडित परिवारको भनाइ छ । तर, सत्यनारायणका परिवारले कसैलाई बोक्सी किटेर गाली नगरेको तर्क गरेका छन् । गाउँघरमा बोक्सी भनेर गाली गर्ने चलन छ । चर्को स्वरमा गाली गर्ने पनि चलन भएकोले त्यस्तो गाली गरेको हो कसैलाई किटानी गरेर बोक्सी नभनेको सत्यनारायण साहको भनाइ छ । तर, झगडा शनिबारको रातमा रीतादेवीले आफ्नो घरमा पानी फालेकोले भएको सत्यनारायण साहले बताए । पीडितले सत्यनारायण साह, रामनारायण साहलाई पनि बिपक्षी बनाई इलाका प्रहरी कार्यालय सेढवामा जाहेरी दिएका छन । इलाका प्रहरी कार्यालय सेढवाका प्रहरी सहायक निरीक्षक मोहन थापाले दुवै पक्षलाई राखेर छलफल गरेर दुवै पक्षलाई सहमत गराउने प्रक्रिया शुरु गरेको बताएका छन् ।