संयुक्त मधेशी मोर्चाका कार्यकर्ताले विराटनगर उमनपा-१८ मलाया रोडस्थित एमएम प्लाष्टिक उद्योगमा आक्रमण गर्दा त्यहाँ कार्यरत सुरक्षागार्ड उमेश विश्वकर्मा घाइते भएका छन् । उनको टाउकोमा चोट लागेको छ । करिब २ सयको सङ्ख्यामा रहेका प्रदर्शनकारीले उद्योगमा आक्रमणको प्रयास गरेका थिए । घटना लगत्तै पुगेको प्रहरीले आन्दोलनकारीलाई तितरबितर पारेको थियो । उद्योग आक्रमणमा संलग्न रहेको आरोपमा विराटनगर उमनपा-१९ का ४८ वर्षीय जगदीश साहलाई नियन्त्रणमा लिएको जिल्ला प्रहरी कार्यालयका प्रवक्ता डीएसपी प्रमोद खरेलले बताए । आन्दोलनरत पक्षले दुई जना प्रदर्शनकारीलाई प्रहरीले गिरफ्तार गरेको दाबी गरेका छन् । यसैबीच विराटनगर उमनपा-१७ रोडशेष चोकमासमेत आन्दोलनकारीले सडक अवरुद्ध गरी नाराबाजी गर्दा भीडलाई तितरबितर गर्ने क्रममा झडप भएको प्रहरीले जनाएको छ । सङ्घीय समाजवादी फोरमका केन्द्रीय सदस्य जयराम यादवले आन्दोलनकारीलाई आतङ्कित पार्ने उद्देश्यले प्रहरीले अश्रुग्याँस र हवाइफायर गरेको दाबी गरे । शान्तिपूर्ण प्रदर्शनमा प्रहरीले दमन गरेको उनले आरोप लगाए ।