अन्‍नपूर्ण मिडिया नेटवर्क अन्तर्गत सञ्चालित रेडियो अन्नपूर्ण नेपाल ९४ मेघाहर्जको भ्यानमा शुक्रबार राती न्यूरोड गेट अगाडि एक अज्ञात समूहले आक्रमण गरेको छ। गुडिरहेको गाडीमा इट्टा प्रहार गर्दा भ्यानको अगाडिको सिसा फुटेको छ। 'अचानक ड्याम्म सिसामा आवाज आयो र गाडी असन्तुलित भयो। धन्न रोक्न सके। गाडी रोकेपछि चार जना जतिको समूह न्यूरोडतिर भाग्दै गल्लीभित्र छिरे', चालक रमेश गिरीले भने -'त्यसपछि प्रहरीलाई खबर गरें।' प्रहरीले आक्रमणकारीलाई खोजी भइरहेको बताएको छ। न्यूरोडस्थित जनसेवा वृत्तका डिएसपी विनोद घिमिरेले रेडियो अन्नपूर्णसंगको कुराकानीमा भने-'रातीको समयमा लुकेर आक्रमण गरेको देखिन्छ। आक्रमण गर्ने समूहको खोजी कार्य भइरहेको छ।'