हत्या अभियोगमा अदालतबाट सजाय पाएका फरार व्यक्ति ६ वर्षपछि पक्राउ परेका छन् । केन्द्रीय अनुसन्धान ब्युरो (सिआइबी)ले दाङका सीताराम चौधरीलाई सोमबार अनामनगरबाट पक्राउ गरेको हो । चौधरीसहितका व्यक्तिले २६ चैत ०६६ मा रमेश हमाललाई घरबाटै अपहरण गरी हत्या गरेका थिए । दाङको हेकुली गाविसमा पाँच दिनपछि उनको शव फेला परेको थियो । घटनापछि चौधरी फरार थिए । उनलाई अदालतले जन्मकैद (२० वर्ष)को सजाय सुनाइसकेको छ । प्रहरीले चौधरीलाई अनामनगरबाट पक्राउ गरी अदालतमा पेस गरेपछि उनी जेल चलान भएका छन् ।