औषधि र इन्धन निर्वाध भित्रँदै आएको पश्चिमको प्रमुख नेपालगन्ज-रुपैडिहा नाकामा मधेसी मोर्चाका कार्यकर्ताहरुले फेरि पनि प्रदर्शन गर्न थालेपछि तनाव भएको छ । मोर्चाले शनिबार बिहानदेखि नाकामा प्रदर्शन जारी राखेका छन् । मोर्चाको अवरोधका कारण पश्चिमको प्रमुख नाका ठप्प भएको हो । उनीहरु दशगजामा बसेर नाका अवरोध गरेका छन् । सीमास्थित इलाका प्रहरी कार्यालय, जमुनाहाका असइ हरिबहादुर गुरुङले बताए । उनले बिहान १३ वटा मालबाहक गाडीहरु नेपालगन्ज भित्रिएको बताए । तर, अवरोधका कारण भारतीय कष्टम भइसकेका १ सय बढी मालबाहक गाडीहरु पारी रुपैडिहामा रोकिएका छन् । मोर्चाका कार्यकर्ताहरुले शुक्रबारदेखि नाका अवरुद्व गर्न खोजेका थिए । तर, प्रहरीले हटाएको थियो । शनिबार बिहानै मोर्चाका कार्यकर्ताहरु फेरि नाकामा जम्मा भएका छन् । नेपालगन्ज नाका सहज भएपछि औषधि, इन्धन र मालबाहक गाडीहरु सहजरुपमा भित्रँदै आएको थियो । रुट परिवर्तन गरी मालबाहक गाडीहरु यो नाकाबाट नेपालगन्ज भित्रँदै आएका थिए ।