सद्भावना पार्टीका अध्यक्ष राजेन्द्र महतोमाथि भएको आक्रमणको बिरोधमा जनकपुरमा बिहानैदेखि विद्यार्थीले प्रदर्शन गरेका छन् । मधेश आन्दोलनरत मधेसी मोर्चाको एक घटक सद्भावनाका अध्यक्ष महतो शनिबार विराटनगरमा प्रहरीसँग भएको झडपको क्रममा घाइते हुनुभएको थियो । घटनाको बिरोधमा आइतबार बिहानैदेखि जनकपुरमा विद्यार्थीले प्रदर्शन गरेका हुन् । घटनाको विरोध एवं दोषी प्रहरीमाथि कारवाहीको माग गर्दै जनकपुरका सम्पूर्ण शिक्षण संस्था एक दिनको लागि बन्द गरी विद्यार्थीले रामानन्दचोक, पिडारीचोक बजरंग चोक लगायतका ठाउँमा टायर बालेर प्रदर्शन गरेका छन् । प्रगतिशील मधेसी समाज अन्तर्गत रहेको प्रगतिशील विद्यार्थी समाजको अगुवाईमा विद्यार्थीहरुले नाराबाजी गर्दै प्रधानमन्त्री र गृहमन्त्रीको राजिनामा समेत माग गरेका छन् ।