भरतपुर उपमहानगरपालिका- १० स्थित सुनगाभा लेडिज होस्टेलमा बस्दै आएकी एक सात वर्षीया बालिकाको उद्धार गरिएको छ । ती बालिकालाई चितवन प्रशासनको सहयोगमा फागुन १४ गते उद्धार गरिएको चितवन प्रहरी प्रमुख एसपी बसन्त कुँवरले जानकारी दिए । बालिकाको थप परिचय र ठेगाना नखुलेको प्रहरीले जनाएको छ । पाँच महिना पहिला आमासँग होस्टेलमा आएकी बालिका आमाले तीन दिन होस्टेलमा काम गरेपछि त्यही छाडेर भागेको र कहिल्यै उनलाई लिन नआएपछि बालिका बालश्रमिकका रूपमा सुनगाभामा होस्टेलमा नै बस्दै आएकी थिइन् । बालिका जोखिममा रहेको सूचनाको आधारमा तत्कालै उद्धार गरिएको प्रहरीले जनाएको छ । बालिकालाई सहाराको घरको संरक्षणमा राखिएको छ ।