विद्यार्थीको अनुशासन हेरविचार गर्न राखिएका अनुशासन निरिक्षक (डिआई) ले एक विद्यार्थीको कानको जाली फुट्ने गरि पिटेको आरोपमा प्रहरीले पक्राउ गरेको छ । ललितपुर कुमारीपाटीको क्यास्पियन कलेजका डीआई दिपेन्द्र श्रेष्ठले गएको हप्ता लेलेका सलन डालीम डंगोललार्ई कानको जाली फुट्ने गरी पिटेका थिए । उनीविरुद्ध प्रहरी प्रभाग लगनखेलमा उजुरी परेको थियो । विद्यार्थीलाई पिटेर फरार रहेका उनलाई १० दिनपछि पक्रेको प्रहरीले जनाएको छ । कलेजको क्यान्टिनमा खाजा खाएर फर्किरहेका सलनलाई डीआई श्रेष्ठले बोलाएर मुख मुखै लाग्ने भन्दै पिटेका पीडितको गुनासो छ ।