जनकपुरमा एक बालकको हत्या भएको छ । जनकपुर उपमहानगरपालिका–१९ वेंगाशिवपुरका मोहम्मद असलम राईन कवारीका ५ वर्षका छोरा असरफ राईनको अपहरणपछि हत्या भएको बालकका आफन्तले आरोप लगाएका छन् । शनिबार बिहान १० बजे घरबाट खेल्ने क्रममा बेपत्ता भएका असरफको शव आइतबार बिहान घर नजिक गहुँ खेतमा हत्या गरेर फालिएको अवस्थामा फेला परेको प्रहरीले जनाएको छ । बालकको कुटपीट तथा घाँटी थिचेर हत्या गरेको हुन सक्ने प्रहरीको आशंका छ । बालकको टाउकोमा चोट लागेको छ । बालक असरफका बुबा असलम वैदेशिक रोजगारको शिलशिलामा कतारमा हुनुहुन्छ । एक छोरा र दुई छोरी रहेको असरफका परिवारमा एक मात्र छोराको हत्या भएपछि आमा अपसना खातुन अचेत हुनुभएको छ । बालकका काका सोमन राईनले असरफ घरबाट शनिबार बिहानै बेपत्ता भएको र आफूहरुले जिल्ला प्रहरी कार्यालयमा निवेदन दर्ता गराई आफन्त नातागोता कहाँ खोजखबर गर्दा फेला नपरेको र आइतबार बिहानै गहुँ खेतमा बालकको शव हत्या गरेर फालिएको अवस्थामा फेला परेको बताउनुभयो । बालकको शवलाई पोष्टमार्टमको लागि जनकपुर अञ्चल अस्पतालमा राखिएको र घटनाको विषयमा थप अनुसन्धान भइरहेको जिल्ला प्रहरी कार्यालय धनुषाका प्रहरी नायव उपरीक्षक नकुल खरेलले जानकारी दिनुभयो ।