उदयपुरमा एक बालकको अपहरण गर्न खोजेको आरोपमा एक जना पक्राउ परेका छन् । उदयपुर कटारीबाट ललाई फकाई एक बालकलाई मोटरसाइकलमा लग्दै गरेका युवालाई पक्रेर प्रहरीले बिहीबार सार्वजनिक गरेको हो । उदयपुरको पश्चिमी गाविसका ९ वर्षका एक बालकलाई बुधबार खेलिरहेको अवस्थामा फकाएर मोटरसाइकलबाट सिरहातर्प लैजाँदै गरेका सिरहा गौरपुर–३ का ३२ वर्षीय लबलाइ महतोलाई प्रहरीले कटारी नगरपालिका–६ बाट पक्राउ गरेको हो । बालकलाई जर्बजस्ति मोटरसाइकलमा लगेपछि उनका साथीले अभिभावकलाई जानकारी गराएका थिए । जानकारी पाए लगत्तै अभिभावकले इलाका प्रहरी कार्यालय कटारीलाई फोनबाट खबर गराएकाले महतोलाई पक्राउ गर्न सफल भएको इलाका प्रहरी कार्यालय कटारीका प्रमुख डिएसपी दिपककुमार बस्नेतले जानकारी दिनुभयो । महतोसँगै प्रहरीले उनको स ६ प २७१० नम्बरको मोटरसाइकललाई समेत नियन्त्रणमा लिएको छ ।