सल्यानको छायाक्षेत्रमा बुधबार दुई बालबालिकासहित एकै घरका चार जनाको हत्या भएको छ । बुधबार बिहान ८ बजे छायाक्षेत्र–९ रानागाउँकी २२ वर्षकी सीता खान, सीताका छोरीहरु साढे दुई वर्षकी पवित्रा तथा डेढ वर्षकी सविताको हत्या भएको अवस्थामा शव फेला परेको हो । यस्तै मार्के घर भएकी सीताकी बहिनी १८ वर्षकी पवित्रा गिरीको पनि हत्या भएको प्रहरीले जनाएको छ । उनीहरु सबैको घरमै हत्या भएको सल्यानका प्रहरी प्रमुख डिएसपी श्यामबहादुर खत्रीले जानकारी दिनुभयो । हत्याको कारण खुल्न नसकेको र घटनाको विषयमा अनुसन्धान भइरहेको उहाँले बताउनुभयो । उनीहरुको बलात्कारपछि मंगलबार रातिमा हत्या भएको हुनसक्ने प्रहरीको अनुमान छ । घटनास्थलमा अहिले डिएसपी खत्रीसहितको टोली पुगेको छ । क्षेत्रीय अनुसन्धान व्युरो नेपालगञ्जको टोली आउने प्रहरीले जनाएको छ । सीताका श्रीमान रमेश खान मजदुरीका लागी अहिले भारतमा छन् । घटनास्थलबाट प्रहरीले एउटा मोबाइल फेला पारेको छ ।