सिरहाको मिर्चैया नगरपालिका– ७ स्थित तीन घरमा गएराति डकैती भएको छ । आठ/दशजनाको समूहमा आएका नकावधारी समूहले बम विस्फोट गराउँदै स्थानीयवासीलाई त्रसित बनाएर डकैती गरेका छन् ।मिर्चैया नगरपालिका– ७ का राजाराम यादव, रामेश्वर यादव र मीरा पोखरेलको घरबाट डाँकाहरुले अन्दाजी रु १० लाखभन्दा बढीको सम्पत्ति लुटेर लगेको स्थानीयवासी जीवन तिवारीले जानकारी दिए । उनकाअनुसार घरबाट डाँकाहरुले नगद, सुनचाँदीका गरगहना, मोबाइल, ल्यापटप र अन्य जिन्सी सामान लुटेर लगेका छन् । इलाका प्रहरी कार्यालय मिर्चैयाबाट एक किलो मिटरको दुरीमा घटनास्थल पर्छ । तर समयमा प्रहरी घटनास्थल नपुगेपछि डाँका लुटपाट गरी भाग्न सफल भएको स्थानीयवासी बताउँछन् । स्थानीयवासी तिवारीले भने, ‘बम पड्काउँदा हामी स्थानीयवासी डरले भाग्याैं । प्रहरी समयमा नआउँदा डाँकाहरु लुटपाट गरी भाग्न सफल भए ।’ डाँकाको प्रतिकार गर्दा स्थानीय ललितादेवी यादव घाइते भएकी छन् । धारिलो हतियार प्रहारबाट घाइते भएकी उहाँको उपचार स्थानीय अस्पतालमा भइरहेको र अवस्था सामान्य रहेको इलाका प्रहरी कार्यालय मिर्चैयाका प्रहरी निरीक्षक श्याम सिंह चौधरीले जानकारी दिए । घटनाबारे अनुसन्धान तथा संलग्न व्यक्तिको खोजी भइरहेको प्रहरीले जनाएको छ ।