जिल्ला बाल कल्याण समितिले अवैध रुपमा सञ्चालन भइरहेको बालगृहबाट जेठ १५ गते पाँच जना बालबालिकालाई उद्धार गरेको छ ।
सर्लाही नेत्रगञ्ज-३ स्थित निजी घरमा अवैध रुपमा सञ्चालन भइरहेको 'असल प्रयास सेवा सदन बालगृह'बाट चार जना बालक र एक जना बालिकालाई जिल्ला बाल कल्याण समितिले उद्धार गरेको हो ।
उद्धार गरिएका चार जनालाई हरिवन स्थित बालगृहमा र एक जनालाई अभिभावकको जिम्मा लगाइएको महिला तथा बालवालिका कार्यालयकी अधिकृत अम्बिका पौडेलले बताइन् ।
बालगृहमा घरायसी काम, धर्म परिवर्तनका लागि प्रशिक्षण दिएर क्रिश्चन धर्म अँगाल्न बालबालिकालाई बाध्य बनाउने गरेको सूचान पाएपछि बालगृहबाट बालबालिकाहरूलाई उद्धार गरिएको जिल्ला प्रशासन कार्यालय सर्लाहीले जनाएको छ ।
बालबालिकालाई अबैध रुपमा राख्ने रोमिला जोशीलाई आवश्यक कारबाही गरिनेसमेत जिल्ला प्रशासन कार्यालयले जनाएको छ ।
ढुङ्ग्रेखोला-४ स्थित सञ्चालनमा रहेको कल्पनाको 'जीवन नेपाल बालगृह'समेत कानुन विपरित सञ्चालन भएको पाइएको छ ।
बालगृह सञ्चालनका लागि अनुमति नलिएर आमा बुवा भएका कम उमेरका बालबालिकालाई समेत राख्ने गरेको पाइएको जिल्ला प्रशासन कार्यालयले जनाएको छ ।