कञ्चनपुरको ब्रह्मदेव नजिक महाकाली नदीमा आज अन्दाजी ६५ वर्षीया महिलाको शव फेला परेको छ । नदीको भारततर्फको किनारामा शव बगेर आउँदै गरेको अवस्थामा देखिए पछि भारतीय प्रहरीले शवबारे नेपाल प्रहरीलाई खबर गरेको हो । नेपाली महिलाको शव बगेर आएको खबर प्राप्त भएपछि इलाका प्रहरी कार्यालय ब्रह्मदेवका प्रहरी नायब निरीक्षकको संयोजकत्वमा टोली त्यसतर्फ पठाइएको जिल्ला प्रहरी कार्यालयका प्रहरी नायब उपरीक्षक केदार खनालले बताए । ‘बगेर आएको महिलाले हातमा बाला लगाएको र कानमा सुनको गहना रहेको टोलीले खबर गरेको छ’, उनले भने । स्थानीय बासिन्दाले फेला पारेको शव त्यस क्षेत्रको नभएको बताएकाले पहाडी क्षेत्रबाट शव बगेर आएको हुनसक्ने उनले बताए ।