१८ वर्षीया युवतीलाई बलात्कार गरेको आरोपमा बकधुवा गाविस-२ का २३ वर्षीय देवकुमार सदाविरुद्ध जिल्ला प्रहरी कार्यालयले ११ महिनापछि ०७३ जेठ २३ गते मुद्दा दर्ता गरेको छ । ०७२ असार २२ गते पीडितलाई बलात्कार गरेको आरोपमा आरोपित सदाविरुद्ध अदालतबाट परमादेश भएपछि बलात्कार मुद्दा दर्ता भएको सप्तरी प्रहरीले जनाएको छ । पीडितको उजुरी दर्ता नभएपछि पीडितले जिल्ला प्रहरी कार्यालय र जिल्ला प्रशासन कार्यालयविरुद्ध ०७२ असार २९ गते परमादेश जारी गर्न माग गर्दै पुनरावेदन अदालतमा निवेदन दिएका थिए । पुनरावेदन अदालतका न्यायाधीशद्वय माधवप्रसाद पोखरेल र राजकुमार वनको आदेशले ०७२ चैत १४ गते जाहेरी दरखास्त दर्ता गरिदिनु भनी परमादेश जारी भएको थियो ।