स्थानीय युवतीमाथि यौनजन्य दुर्व्यहार आरोप लागेका जिल्लाका एक स्वास्थ्यकर्मी 'फरार' भएका छन्। माइमझुवा गाविसस्थित स्वास्थ्य चौकी इन्चार्ज असिस्टेन्ट हेल्थ वर्कर (अहेव) उमेश साह जेठ दोस्रो सातायता फरार रहेको प्रहरीले जनाएको छ । आफूलाई यौनजन्य दुर्व्यहार गरेको दाबी गर्दै स्थानीय २५ वर्षीया युवतीले सप्तरीको औरही गाविस–२ घर भएका साहविरुद्ध जिल्ला प्रशासन कार्यालयमा जेठ १२ मा उजुरी दिएकी थिइन् । सामाजिक संस्थामा कार्यरत ती युवतीले साहले कार्यस्थलमै आफ्नो शरीरमा हात लगाएर यौनजन्य दुर्व्यहार गरेको भन्दै उजुरी दिएको प्रशासनले जनाएको छ । साहले ती युवतीलाई मोबाइलमा 'तिम्रो इच्छा के छ ?' भन्दै एसएमएस पठाएका थिए । 'मेरो इच्छा केही छैन, तपाइँको ?' भन्ने जवाफसहितको आफ्नो जिज्ञासामा साहले 'एक–अर्कालाई माया गर्ने' प्रत्युत्तर पठाएको उनले बताइन् । डिएसपी रुकेश तण्डुकारले आफूविरुद्ध उजुरी परेपछि अहेव साह फरार रहेको बताए । 'उजुरी परेपछि साह कार्यालयमा हाजिर भएका छैनन् । हाम्रा सबै इकाईले खोजिरहे पनि पत्ता लगाउन सकिएको छैन,' डिएसपी तण्डुकारले भने, 'साहविरुद्ध निलम्बनसहित कारबाहीप्रक्रिया अघि बढेको छ ।'